Est-c’ qué j’vos ai d’jà dit qu’Labricot étot versé dins l’commerce. Cà, y tient eun boutique d’épiceries, d’aunages, tout çoulà, éié çà va fin bin, savez. Y vind du suque gris, dé l’castonnade, du sirop, du fin bleu, d’l’estocfisse, du café, des gants d’fil d’osselle ; infin, tout qu’est-c’qué vos volez, quoi, éié l’preuve qué çà va bin, c’est qu’il a sté obligé d’prinde eun gamin Mimile, pou fai les commissions. Y n’ia toudis eun monde affreux dins s’boutique. Labricot fait étout dins les vins, il est marchand d’vermouth, d’madère, d’curaçao. Nin pus tard qué l’sémaine passée, Labricot étot à l’cave ; y rinte eun crient
qui d’mande à Mimile :
Monsieu n’est nin çi ?
Si fait, y dit Mimile, il est justemint à l’cave, in train d’fai du vin d’Malaga.
Ah ! y répond l’crient, qui v’not, quér eune boutelle dé vin d’Muscaque, si y fait s’vin li-mainme, j’ervienrai eun aute coup.
Eié y n’a pus ervenu, savez.
Mais, jé n’sais nin, Labricot y s’aperçoit qu’Mimile chuche toudis, à continuer ; y voit qué l’Z’amandes, les raisinets, les pronnes, tout çà s’in va éié, l’aute joû, y treuve eune piérette dé pronne à terre.
Mimile, qui dit.
Ouais, mossieu.
Tu minges tous mes pronnes.
Non fait, mosieu.
Si, j’té dis.
Non, qué j’dis.
J’té dis qu’si, mi, ravize.
Qué ?
V’là co ci eune piérette.
Ah ! çà, monsieu, c’n’est nin mi, pasqué, les piérettes, jé l’z’avale toudis.
RSS 2.0