Bouchazoeu à Paris

Vingt noms d’eune pipe ! n’iavot-y longmin qu’mosieù Bouchazoeu s’avot promis d’aller visiter Paris. D’pis tois quate mois, y n’révot foque capitale, y s’révillot in cerveau, pinsant qui v’not d’quéie du haut d é l’terre Eiffel ; mais tout d’mainme, quand y s’lévot au matin, y stot core à mitan contint d’s’ertrouver à côté dé s’feume. A vrai dire, y stot timps qué l’jou du départ fusse arrivé ; y comminçot à maigrir, on m’a asseuré qu’il avot d’jà r’frein d’eune douzaine dé lives. Pinsez donc, Paris, l’capitale des capitales ! Infin, v’là l’jou arrivé. Y fait ses adieux à s’feume éié lé vlà parti pour huit joùs, avé eun billet d’faveur, qu’li avot fait avoir eun d’ses cousins, domestique d’eun ingénieur du qu’min d’fier. Eh bin ! mon Diu, quée ducasse. In arrivant à l’gare du Nord, il a pau d’ses ys pou raviser tous les merveilles qui s’étalent d’vant li. Pourtant, y n’fait qu’commincer. Y queurt d’bourvard in bourvard, d’palais in palais, d’musée in musée. Y parcourt les gardins, les squares. L’premi jou, y stot d’jà à bout. Y r’commince l’deuxième jou. Ouais mais, pa l’caleur qui fait quand on trotte ainsi, y boit eune paire dé grinques, deux tois pintes, si bin qué v’là t’y nin qui n’sé rappelle pus l’nom d’l’hôtel aïus qui stot déquindu, avé s’malle, s’parapuie, tous ses affutiaux, quoi, éié aïus qu’on d’vot li récrire.
  Eh bin ! in v’là eune bonne, qui s’dit in li-mainme. Il avot biau d’mander à les geins ou bin à l’z’agents d’police l’hôtel aïus qui n’iavot eune porte verte, on li riot au nez. Infin, à bout, n’y tenant pus, y n’a rin trouvé d’mieux qu’d’invouyie eune dépêche ainsi, à s’feume : « Dis-moi donc où je suis descendu à Paris. Adresse réponse, Brasserie Pousset, boulevard des Italiens ». S’feume li a répondu tout d’eune : « Grand Bouchazoeu, tu es descendu Hôtel de Fénelon, rue Féron ; c’est ton adresse ; n’oublie pas aussi la mienne ».