Eun amour d’éfant

Monsieu l’curé est in train d’fai s’petite tournée dins l’village. Y raccroche l’eun éié l’aute, taille eune bavette par là, éié, finalemint, rinconte l’feume Laspédique, qui s’pourmène avé s’gamin, eun p’tit Jésus d’cinque six ans. Monsieu l’curé dit bonjou à l’feume Laspédique, li d’mande quée nouvelle, commint qu’çà va, tout çoulà, éié, ravizant l’marmouzé qué l’feume tient pa l’main, y dit :
  Mon Dieu, madame, c’est à vous ce bel enfant, qu’il doit être gentil, ses yeux parlent pour lui !
  Ah ! oui, rinchérit l’mère t’aussi rade, des éfants l’ainsi on nin trouve nin treize à l’douzaine, savez, il est geintil jamais d’la vie ! (s’adressant au gamin). Dis bin bonjou à monsieu l’curé, m’n’éfant. L’éfant, su eun ton qui n’admet nin l’réplique. – J’né l’dirai nin. L’mère, toute gênée, dit au curé :
  N’faites nin attintion, savez, mossieu l’curé, c’est pasqu’il est honteux. L’gamin roule des ys furibonds éié, ravizant s’mère in plein nez, y li répond :
  T’as minti. L’pouve feume s’arot bin mis dins eun trau d’sorite.

**********

Monsieu Taffiard voit s’domestique rintrer dins eun cabaret.
  Justin, qui dit monsieu Taffiard, j’sus fin ahuri d’vos vire rintrer dins eune parelle maison… Vous, qué j’coyos si sobe…
  Vos s’rîtes bin pus ahuri, répond Justin, si vosm’veyîtes sorti.

********** Marchuque s’in va à l’pêque, l’sémaine passée. Arrive eun garde asto d’li, qui l’interpelle :
  Avée eune autorisation pou péquie droci ?
  Ouais, répond Machuque, j’ai eune autorisation verbale.
  Faut mé l’moutrer, qu’répond l’garde, ou bin j’vos flanque eun procès-verbal.

L’père Biétapinte arrive tout joyeux à l’maison du maîte d’école, avé eune lette à s ‘main. - Vos n’savez nin eune novelle, m’sieu l’maîte, qui dit ainsi, m’fieu m’écrit qu’il est retoqué à s’n’examen.
 Bah ouaitte !
 C’est-y bon, çoulà ?

********** Quée différince, qui dit l’maîte, intré « suffisament » éié « assez » ?Bin v’là, qu’répond l’losse dé Nénesse. Quand j’ai mingé deux morcheaux d’tarte, à no maison, m’moman treuve qué j’dai mingé « suffisamment », comme elle dit. Mais c’n’est qu’quand j’in ai mingé six morcheaux, qué j’treuve qué j’in ai « assez », mi.

********** Intindu au café :
 Garçon !
 V’là, m’sieu.
 Donnème eun verre dé cognac.
 Mossieu veut-y du cognac à quate sous ou bin du cognac à dix sous ?
 Quée différince qui n’ia ?
 C’est l’mainme, seulemint l’cien à dix sous, on vos l’sert dins eun verre in cristal éié il est pus p’tit.

********** Nénesse éié Justin sortent du tribunal, aïus qué Nénesse vient d’attraper vingt-cinque francs d’aminde, pou s’avoir battu. Nénesse dit à Justin :
 Vingt-cinque francs ! c’est d’jà eune saqué pou eun simpe coup d’tiête qué j’li ai donné. Eié Justin d’réponde :
 Acoute, fieu, les coups d’tiête on les païe toudis chers ; ravize, mi, c’est d’eun simpe coup d’tiête qué j’m’ai marié.

********** J’étos à Ostende, eun dimanche d’aoûte, pou vire l’mer. Eune feume élorme, dont l’costume n’maintenot qu’à grande’peine les formes débordantes, questionne eun maîte nageu su l’galet :
  Est c’qué l’mer va bintôt r’monter, camarade ?
 T’aussi rade qué vos s’rez dins l’iau, çà, madame, disti l’aute.