Y n’ia des geins qui n’sont nin curieux, mais qu’aiment bin d’tout savoi. Mainme quand y savent, y z’ont tellemint l’habitude d’démander qué qu’est-ce, qu’on les voit arriver tout d’eune : « Pouqué fai çoulà ? » Quand j’in vois eun ansi, qu’est bin attrpé, j’n’in fais qu’rire éié j’dis qu’c’est bin fait, savez.
Y n’ia là Monsieu Machin, c’est eun mainme parel. Y n’sarot erténi s’lanque, c’est plus fourt qué li. Y faut qui boute s’nez tout partout, quand y n’iarot core deux cints personnes. Y faut dire qui n’a qu’çà à faire, allons. Si tous les jous au matin, c’est li qu’est chargé d’mainner l’quien dé l’maison fai ses commodités, in déhours dé çà, il est libe d’tous ses mouvemints.
Mais il est d’eune curiosité !
L’aute jou, y passot à Houtmont, dins l’rue dé l’Providence. On étot in train d’dépaver éié d’creuser pou poser les rails du tram. Y li a fallu absolumint savoir pou qué ci éié pou qué là.
Pouqué qu’on fait ouvri ainsi tout l’rue ?
Bé, qu’li répond l’aute, c’est pasqu’y n’ia eun monsieu qu’a pierdu eune pièce dé dix sous, on cache après.
Y n’faut nin d’mander si les geins s’sont mis à rire éié si no curieux est parti avé s’dos tout crons, éno ?
Y n’a mi sté guéri pou çà.
In pau pus long, du côté du pont d’Sambre, y voit sortir d’eun trau d’arqueduc, eun pouve diabe noir comme eun démon, rimpli d’berdouille jusdéqu’au d’seur dé l’tiête.
L’curieux s’in va doit d’ssus.
Mais qu’est-c’qu’on fait bin dins c’n’arqueduc, qui n’ia si longmin qu’on y tripote ?
Bé, répond l’aute, on est in train d’dorer les plafonds éié d’poser des glaces.
BRIBEUX 1900.
RSS 2.0