L’lapin éié l’carpe

Dire qué j’n’ai nin core pinsé d’vos conpoter l’bonne blague dé Monsieu Burdépot, eun cacheu comme y n’dia pus éié eun farceu au liméro eun. Ravisez, lé v’la qui r’vint d’avoir été tirer l’lapin chez eun de ses camarades ; y passe à travers camps, chufflant après s’tien, qu’a toudis l’rage d’courir après les glaines, quand y vient à côté d’une ceinse. Il est rudemint querqué, savé, il a s’carnassière rimplie bourd à bourd : deux lapins, eun liève, tois pertrix, Eié y s’in va heureux, Monsieu Bordépot, y rit à z’anges. Y r’vient pa l’vauïe, tout l’long dé l’rivière, in busiant à s’rintrée triomphante à s’mauson. Mais … qu’est-c’qué c’est d’çà … waittez … là … au bourd dé l’rivière … y n’dia eun homme indormi. Ah ! c’est eun péqueu, il a s’line dins l’iau éié y pique eun p’tit somme.
 Attinds eun avée, y dit Monsieu Burépot, in songeant à l’farce qui va fai.
 Tiens mais … on dirot qu’çà béque … In effer, v’là l’bouchon qui pique eune tiête dins l’iau…
 Vingt noms, çà doit ête eun fameux, y dit Monsieu Burdépot. Eié, in d’sant çà, y tire tout doucemint l’line … c’étot eune belle carpe, qui n’iavot au d’bout ! Y s’in va l’pinde à eune arbe, conte l’dormeu. Il affique au d’bout dé l’line, à hameçon, eun lapin, l’laye aller tout bellemint dins l’rivière éié, à mode dé rin, y r’met l’line tout doucemint dins l’main du dormeu.
 Attintion, y dit in li-mainne Monsieu Burdépot, mais qu’on va avoir du plaisi… Y querche s’fusique éié : pan ! … y tire l’pichon su l’arbe, L’dormeu, du coup, sautelle in air, comme s’il avot sté lancé pa eune arbalète éié, tout in frottant ses yx, y voit s’bouchon qui s’in allot à fond, Y r’saque éié voit eun lapin ! Y n’faut nin d’mander qué z’yx faisot l’péqueu, éno ?
 Eun lapin ! qui crie tout in stoumaquant, eun lapin ! ...
 Qu’est-ce qui n’ia ? qu’est-c’qué vos dites ? y dit Monsieu Burdépot, in faisant l’chénance dé raccouri.
 Eun lapin … dins l’iau … droci … à m’line … eun lapin … ravisez…
 Bé, qu’est-ce qué vos trouvez d’si drôle à çoula, y dit Monsieu Burdépot in moutrant l’carpe ; j’viens bin d’tirer eun pichon su eun arbe.