L’minteu d’lasdépique

Y n’d’ia qui saittent mintir, savez, tellemint qu’pa momint y coient eusses-mainmes c’qui racontent. Eh bin ! Lasdépique, qu’on appelle, eun cousse qui voyage pou les pipes in écoeume dé…terre, v’là eun oti qu’quand y vos interprind, y vos f’rot dormi les ys tout grands ouvris. Acoutelle, il est là tout près des jueux d’piquet, au cabaret, in train d’feumer s’pipe, c’t’à peine si on peut placer eune parole intré ses discours.
  T’erviens d’voyage ainsi, Lasdépique ?
  Ouais, j’ai voyagé deux mois durant.
  Bah ! éié t’as sté long.
  Oh ! oui, j’ai vu la Haute-Marne, la Basse-Marne, l’Finismère, j’ai déquindu les côtes jusdéqu’au Bas-Rhin, j’ai franchi l’Jura, l’Oise, l’Meurthe-et-Oselle, la Somme.
  Somme, c’n’est nin Amiens, çà ?
  Si, vos avez raison.
  Yn’ia eun biau musée, là, j’l’ai vu, mi.
  Put !… Qu’est c’qué c’est d’çà ? Jai vu l’Bristique Muse et homme à Londres, mi, c’est là qu’on peut vire l’pipe d’Charlemagne éié l’crayon dont Noé s’servot pou inscrire les biêtes au fur éié à m’sure de leu n’intrée dins l’arche.
  Bah ! ouaitte.
  J’ai mainme vu du coton qué l’grand prête Sac à riz s’a mis dins l’z’orelles , l’joû qui f’sot tant d’vint qué l’voile du tempe s’a déquiré.
  Nin possible !
  Si, mais, pût ! qu’est-c’qué c’est d’çà ? J’ai vu, à Paris, eune invintion, jamais d’la vie.
  Qu’est c’qué c’est ?
  Eun téléphone, comme nos v’là ci tertous, qu’les sourds-muets peuttent parler d’Paris à Bruqueselles, comme n’importe qui.
  In parlant d’invintion, qui n’d’ia eun qui dit, mi j’ai vu eune monte qui sonnot l’heure, les quarts, les joûs, les s’maines éié l’z’années.
  Pût ! qu’est c’qué c’est d’çoulà, y dit Lasdépique, si j’vos d’sos qu’j’ai vu, mi qui vos pale, eune monte qui sonnot à messe éié qui marquot l’linge !…
  Vos rimplirez nos pintes, Madame.