L’vaque éié l’viau

Pélagie l’ceinsière ervient avé eun viau qu’elle a accaté à l’ciense dé s’cousine Purificate. Eh bin ! eh bin ! qu’elle dit à s’vizenne Colastique, qué j’ai ieu dé l’misère d’l’avoi.
  Bah ! ouais, l’ceinsie n’volot nin l’vinde ?
  Bé non, bin du contraire, l’marché étot fait, j’avos d’aller l’quer aujourd’hu.
  Bé, qu’est qui n’aviot, d’abourd ?
  Y n’iavot qui n’volot nin s’in aller arrière dé s’mère.
  Ah ! çà, margré qu’c’est des biêtes, y voient vol’tie leu moman, quéquefois pus mieux qu’des geins.
  Eh bé ! j’vos cois ; s’mère l’Noirette qu’on l’appelle, elle n’étot nin là. Cà fait qué j’vas pou m’in aller avé l’viau, y s’layot traîner padrie m’dos, ma fie ... Ouais mais, j’avos m’quémise toute crute dé caud force d’saquie, éié m’cousine, tant pus qu’elle poussot, tant pus qué l’viau n’volot nin avancer.
  Eh bin ! v’là, j’ai vu l’Noirette avot eun guerlot à s’cou, j’ai d’mandé à m’cousine d’l’avoir à prêter, j’l’ai mis à m’cou éié j’sus d’allée in avant, l’viau m’a fin bin suit ; il a pinsé qu’j’étos s’moman.