Monsieu Scrépet

D’hasard qué vos né l’connaissez nin, monsieu Scrépet, c’t’eun spot qu’on li a donné, à force qu’il est scrépé éié qui triane pou ses liards. Jamais d’la vie, on n’a vu eun parel oti : il a peu d’araquie, crainte d’avoi soi ; y met s’burre dins eune gaïole éié, quand y fait eune tarteine, y l’passe su les fils dé fer ; jamais j’vos dis, vos n’sarîtes rincontrer eun avare parel. Il arot bin fait comme c’ti-là, qu’avot rêvé, pindant l’nut, qu’il avot pierdu eune forte somme d’argint ; in s’révillant, y s’a pindu d’chagrin ! A bon,da. S’frère, à monsieu Scrépet, c’étot l’mainme parel ; quand il écrivot eune lette, y n’mettot jamais d’points su les i ni d’ponctuation, pou ménagie l’inque. Sapré arabe, va. Monsieu Scrépet, li, y fait bâtir à s’village éié il a sté forcé d’fai v’ni d’z’ouvris dé l’ville, qu’il a imbauchés li-mainme, pou n’nin avoir affaire à les patrons interperdeus. C’qui l’imbête éié l’persécute du matin au soir, c’est qué l’z’ouvris ont fait marché qui z’arinent ieu leu dîner compris ins leu journée ; autremint, y n’véninent nin. Y finit pa consinti éié va trouver eun cabareti éié eun aute éié core eun aute, personne n’volot s’arringie avéli ; y n’volot donner foque quate sous par homme, pou deiner. Infin, y finit pa in trouver eun qui s’arringe pou cinq sous. L’cabareti s’dit in li-mainme : « Y d’aront pou leus doubes ! » Comme dé jusse, l’preumi jou qu’ces pouves diabes-là arrivent, y leu donne dé l’soupe éié du monfromage ! Y n’faut nin d’mander l’grimace qui z’ont fait, éno, y sont dallés tout in bertonnant. Ouais mais, monsieu Srépet s’informe pou savoi qué éié qu’est-ce, éié il apprind c’qu’on a donné à ses ouvris, pou deiner. Bin vite, y queurt passer s’capote à s’maison. Y n’sé sint pus d’colère. S’mesquenne voit ses lèves qui trianent éié s’déminde si n’va nin li arriver eun coup d’malheur. Monsieu Scrépet déquind éié rinte comme eun

boulet dins l’cabaret :
  Vos ieu donnez dé l’soupe éié du fromage ?
  Ouais, y dis l’cabareti tout saisi.
  Eh bin ! à partir dé d’main, vos donnerez eun jou dé l’soupe éié eun jou du fromage… éié vos n’compterez foque deux sous et demi ! Vos veyez qué s’nom li est bin donné, à monsieu Scrépet ?