Payez vos dettes

L’MÉTIE d’aveugue, çà rapporte quéque-fois pus qu’on n’pinse. J’parle, bin intindu, du métie et non d’l’infirmité li-mainme, qui est bin l’pus trisse, l’pus grand des malheurs qui peut arriver à eun homme, mainme à eune feume. A côté d’tant d’losses qui s’installent avé eune clarinette éié eun tien mouton pou d’mander l’aumône, on treuve malheureusemint des vrais aveugues privés dé l’vue, mais surtout, les orelles fines. Y faut bin qui ieu resse quéque cose, éno ? Ravisez, in v’là-ci eun pur, eun vrai. -Ayez… pi…tié… d’un pauve aveugue qui n’voit pas clair, etti à tertous éié s’feume, in arrivant asto d’li. V’là eun mossieu, qui passe tous les jous qué l’bon Diu fait v’nir éié qui donne eune pièce dé deux sous au pouve diabe. Vos comperdez bin qu’deux sous, tous les jouys, ça vaut les peines, éno ? Oussi, l’aveugue connaît l’pas du monssieu, savez ; sitôt qui l’intind arriver, y derche l’orelle éié s’met in arrêt comme un tien d’cache pa d’vant du gibier. Dimanche passé, l’mossieu a ieu du monde à deiner éié y n’a nin fait s’pourménate du côté du canal. Mais, l’lindemain, avé tous ses évités, y va fai s’pétit tour d’habitude éié y dit in passant tout près d’l’aveugue :
  Voilà eun brave homme à qui je fais une petite charité tous les jours. Eié y li met deux sous dins s’capiau. Ah ! ouais, mais, l’aute, t’aussi vif qué dé l’poute, y crie :
 Hé, monsieu, vos m’dévez deux sous d’hier.