Ils ont levé… leurs bras songlots Sur nos povres et chers onfonts…
C’est Nédazur qu’a fait l’réveillon, y cante in s’in rallant à s’maison. A chaque pas, y change d’canchon, tout in sougloutant. Tous les Prussiens sont volontai… ai, ai, res Quand les gendarmes vont les chercher.
Hou ! qui fait tout l’timps. Il est roste, il est boulli, jour d’la vie !
J’sus l’pus fourt du monde, mi, j’m’appelle Nédazur, sans taques et sans souillures ! j’ai fait l’guerre dé… Hou ! Chine, j’sus dé l’compagnie des pompis et sans malheur qu’on sait pomper, l’cien qu’ouserot jamais v’nir m’impougnie, y s’in rirot pu jamais à s’maison dé s’vie ! Hein ! qui c’est qu’ouserot v’ni m’impougnie ?
Tout d’eun coup, y ravise l’leune, qui luisot comme eune pronne au mitan des estoiles.
Y s’arrête pou l’insulter.
Viens in pau droci, ti, pleine leune, si t’as du cœur… t’as l’air dé rire des geins, sale pleine leune ! Tintinds c’qué t’té dis, hein ? l’pus fourt du monde, mi, viens in pau droci, allons, veyons, si c’est pasqué t’es pleine, y n’té faut nin iête si felle ; ti, tu n’es foque pleine eun coup par mois, mais mi, j’y sus tous les dimanches !
Eié y s’in va in cantant :
Je suis t’un oiseau sur la brange Je bois seulement le dimange
RSS 2.0